INFO+:Mural hau Lekarozko lurretan dagoen Aroztegiko makroproiektua geldiarazteko jardunaldi batzuen baitan egin zen. Lekarozek 285 biztanle ditu (2022, INE) eta makroproiektuak Aroztegiko parajean hotel bat, golf zelai bat eta 220 etxebizitza egiteko asmoa du. Proiektuak kezka eta ezinegona sortu du herritarren artean, batez ere egin nahi den etxebizitza kopuruarengatik (herriak berak duen tamaina bikoiztuko lukeelako, horrek dituen ondorioekin) eta golf zelaia mantentzeko beharko litzatekeen ur hornidurarengatik (Lekarozek bertzenaz ere urtero ur mozketak izaten dituelako). Obrak hasteko lehendabiziko saiakeran, 2021eko udaberrian, bailarako bizilagun talde batek eta aldarriekin bat egin zuen bertze hainbat jendek proiektuaren hasiera geldiarazi zuten. Muralak egun haietan gertatutakoa eta orokorrean, afera honekin gertatzen ari dena, isladatzen du.